Exiliada, rebelde, feminista, iluminada, surrealista, combatente, antifascista, bruxa, alquimista, esposa, nai, vítima, apestada… De recibir unha educación privilexiada en Inglaterra ás sensacións da vangarda parisiense dos anos trinta, onde se fraguaría unha apaixonada relación sentimental con Max Ernst, ata o seu retiro final en México, Leonora Carrington viviu a chegada da guerra en Europa, fuxiu a España, foi internada nun manicomio de Santander, sufriu un episodio psicótico que partiu en dous a súa biografía e foi vítima dunha espantosa violación cuxas consecuencias ecoarían para sempre na súa cabeza.